İslam dinlərin ən mükəmməlidir. Dinimizin ən gözəl cəhətlərindən
biri ziyanlı, natəmiz olanları uzaqlaşdırması və gözəllikləri, paklığı yaxına çəkməsidir.
Son zamanlar ən çox soruşulan suallardan biri də dovşan ətinin
yeyilməsinin caiz olub-olmamasıdır.
Əhli-beyt fəqihləri dovşan ətinin haramlığına dair icma
və ittifaq etmişlər. Buna səbəb məsumlardan gələn mötəbər rəvayətlərdir.
Onlardan bir neçəsini göstərmək istərdik:
Həzrət Əlidən (ə) nəql
olunan rəvayətdə o, deyir ki, Həzrət Peyğəmbərdən (s) məsh olunanların nələr
olduğunu soruşdum, o cavabında buyurdu: “Bunların sayı 13-dür və bu
heyvanlardan ibarətdir: Fİl, ayı, donuz, meymun, ilan balığı, kərtənkələ,
yarasa, ləvrən, əqrəb, hörümçək və dovşan...” (“Vəsailüş-şiə”, cild 16, səhifə
317).
İmam Museyi Kazım (ə)
buyurur: “Məsh olunanlar 13-dür: Fil, ayı, dovşan... Dovşan heyz, cənabət və s.
qüsl edib təmizlənməyən bir qadın idi (Yəni o qadın dovşana çevrilmişdir). ”
(“Vəsilüş-şiə”, cild 16, səhifə 317).
İmam Sadiq (ə)
buyurmuşdur: “Allah və elçisi məsh olunmuş bütün heyvanları haram qılmışdır”
(“Üsuli-Kafi”, cild 6, səhifə 247).
İmam Rza (ə)
buyurur: “Dovşanın haram olunmasına səbəb budur ki, onlar da pişiklər kimidir.
Pişiklər və vəhşi heyvanlar kimi pəncələri var. Buna görə onlar kimi
sayılmışdır... Həmçinin qadınlar kimi heyz olur. Çünki o, məsh olunanlardandır”
(“Vəsailüş-şiə”, cild 16, səhifə 316).
Qeyd: “Məsh olunmuş”
dedikdə İslamdan əvvəl bəzi insanların və ya ümmətlərin işlədikləri günahlara görə
Allah tərəfindən cəza olaraq yuxarıda göstərilən bəzi heyvan cinslərinə çevirməsidir.
Bu cəza İslam ümmətinə Həzrət Məhəmmədə (salləllahu aleyhi və alihi və salləm)
xatir aradan qaldırılmışdır.
